ന്യൂ‌ഡല്‍ഹി: മേജറിന്റെ ഭാര്യ ഷൈല്‍സ ദ്വിവേദിയെ മേജര്‍ നിഖില്‍ ഹാന്‍ഡ കൊലപ്പെടുത്തിയത് വിവാഹാഭ്യര്‍ത്ഥന നിരസിച്ചതിനെത്തുടര്‍ന്നെന്ന് ഡല്‍ഹി പൊലീസ്. കുറച്ചുവര്‍ഷങ്ങളായി നിഖില്‍ ഷൈല്‍സയുടെ പിന്നാലെ ആയിരുന്നെന്നും തന്റെ ആവശ്യം യുവതി അംഗീകരിക്കില്ലെന്ന് ബോധ്യമായതിനെത്തുടര്‍ന്നാണ് കൊലപാതകം നടത്തിയതെന്നും അന്വേഷണത്തില്‍ വ്യക്തമായതായി പൊലീസ് അറിയിച്ചു. സൈനിക ആശുപത്രിയില്‍ ഫിസിയോ തെറാപ്പി ചെയ്യാന്‍ എത്തിയ ഷൈല്‍സ ചികിത്സ തേടാതെ മേജര്‍ നിഖിലിന്റെ കാറില്‍ കയറി പോവുകയായിരുന്നു. യാത്രയ്ക്കിടെ തന്നെ വിവാഹം ചെയ്യണമെന്ന് നിര്‍ബന്ധം പിടിച്ച നിഖിലിനോട് പറ്റില്ലെന്ന് ഷൈല്‍സ ഉറച്ചുപറഞ്ഞു. ഇതോടെ ദേഷ്യം പൂണ്ട ഇയാള്‍ കത്തി കൊണ്ട് യുവതിയുടെ കഴുത്തറുത്ത ശേഷം കാറില്‍ നിന്ന് തള്ളിയിട്ട് അപകടമാണെന്ന് വരുത്തിത്തീര്‍ക്കാന്‍ ശരീരത്തിന് മുകളിലൂടെ വാഹനം ഒാടിച്ചുവെന്നാണ് പൊലീസ് പറയുന്നത്. 2015 ല്‍ നാഗാലാന്‍ഡില്‍ വച്ച്‌ തുടങ്ങിയ ബന്ധം ഷൈല്‍സ ഡല്‍ഹിയിലേക്ക് മാറിയപ്പോഴും തുടര്‍ന്നിരുന്നു. മണിക്കൂറുകളോളം ഇരുവരും ഫോണില്‍ സംസാരിച്ചിരുന്നു. നിഖില്‍ യുവതിയെ അങ്ങോട്ട് വിളിക്കുകയായിരുന്നു പതിവ്. ഒരിക്കല്‍ ഇരുവരും വീഡിയോ കോള്‍ ചെയ്യുന്നത് ഷൈല്‍സയുടെ ഭര്‍ത്താവ് കേണല്‍ അമിത് ദ്വിവേദി കണ്ടെത്തിയിരുന്നു. തുടര്‍ന്ന് ഭാര്യയുമായി അടുപ്പം പുലര്‍ത്തരുതെന്നും തന്റെ വീട്ടിലേക്ക് വരരുതെന്നും കേണല്‍ ദ്വിദേവി മേജര്‍ക്ക് മുന്നറിയിപ്പ് നല്‍കി. എന്നാല്‍, ഇക്കാര്യം കൂട്ടാക്കാന്‍ ഇയാള്‍ തയ്യാറായിരുന്നില്ലെന്നും പൊലീസ് പറഞ്ഞു. ശനിയാഴ്ച ഉച്ചയ്ക്കാണ് യുവതിയെ ഡല്‍ഹി കന്റോണ്‍മെന്റ് പ്രദേശത്തെ ബ്രാര്‍ ചത്വരത്തില്‍ കൊലപ്പെട്ട നിലയില്‍ കണ്ടെത്തിയത്.